Экрандағы ақауларға байланысты iPhone Duo бағасы арзандай бастады

Apple компаниясының алғашқы жиналмалы смартфоны iPhone Duo Қытай нарығына шыққаннан кейін көп ұзамай арзандай бастады. Кейбір сатушылар құрылғыны ұсынылған бағадан төмен ұсынып отыр. Алайда Apple компаниясының ресми дүкендерінде смартфонның жекелеген нұсқалары әлі де тапшы, деп жазады El.kz интернет порталы. 

Сатылымның алғашқы кезеңіндегі дүрбелеңнен кейін баға төмендеді

Қытайдағы Pinduoduo сауда алаңында iPhone Duo «10 миллиард юань» субсидиялау бағдарламасына қосылған. Соның нәтижесінде сатып алушыларға 200–300 юань көлемінде жеңілдік ұсынылады. Бұл шамамен 13,5–20 мың теңгеге тең.

Сатылымның алғашқы күндерінде жағдай керісінше болған. Қайталама нарықта жаңа смартфонды өндіруші ұсынған бағадан 1500–2000 юаньға, яғни шамамен 101–135 мың теңгеге қымбат сатуға тырысқан.

Жады көлемі 256 ГБ болатын базалық нұсқаның бастапқы бағасы 15 999 юаньды құрады. Бұл шамамен 1,08 млн теңге. Ал жады көлемі үлкен модификацияларының бағасы бұдан да жоғары.

Дегенмен жекелеген сатушылардың бағаны төмендетуі смартфонның барлық жерде қолжетімді болғанын білдірмейді.

Пайдаланушылар экрандағы ақауларға шағымданды

Бағаның өзгеруімен қатар құрылғының дисплейіне қатысты мәселелер де талқылана бастады. Кейбір иелері смартфонды пайдаланудың алғашқы күнінде-ақ экранның істен шыққанын хабарлаған. Бұл жиналмалы құрылымның сенімділігіне қатысты сұрақтарды күшейтті.

Смартфонның бағдарламалық жасақтамасына байланысты да мәселе туындаған. Атап айтқанда, Қытайдағы ең танымал қосымшалардың бірі WeChat жұмысына қатысты қиындықтар тіркелгені айтылды.

Соған қарамастан, Apple компаниясының ресми сайтында құрылғының кейбір нұсқаларын жеткізу мерзімі 2027 жылдың қаңтарына дейін созылып отыр. Ал фирмалық дүкендердің көпшілігінде смартфон әлі де еркін сатылымда жоқ.