Екі пойыз соқтығысып, төрт адам қаза тапты

Индонезияның Батыс Ява провинциясында екі пойыздың соқтығысу салдарынан төрт адам қаза тауып, 42-сі жарақат алды, деп хабарлайды EL.kz ақпарат агенттігі Tengritravel.kz-ге сілтеме жасап.

Елдегі көлік министрлігінің өкілінің мәліметінше, апат өткен жұмада жергіліктің уақыт бойынша таңғы 6:03-те болған. Алыс жолға жүретін пойызбен қала маңына қатынайтын пойыз соқтығысқан. Батыс Ява провинциясының полиция өкілі Ибрагим Томпоның айтуынша, екі пойызда 478 жолаушы болған.

MetroTV және Kompas TV жергілікті телеарналарын түсірген видеоматериалдардан пойыздардың бірнеше вагоны рельстен шығып кеткенін байқауға болады. Екі пойыздың да алдыңғы вагондары қирап қалған.

Қайтыс болған төрт адам пойыз қызметшілері: қала маңына қатынайтын пойыздың машинисі және оның көмекшісі, ал экспресте стюард пен күзетші қайтыс болған. Олар вагондар арасында қысылып қалған. Барлық жолаушылар пойыздардан шығарылып, жергілікті ауруханаларға жеткізілді.