eGov енді ауруханаға түскеніңізді жақындарыңызға хабарлайды

Қазақстанда eGov.kz порталы мен eGov Mobile қосымшасында жаңа сервис іске қосылды. Енді азаматтар төтенше жағдайда ауруханаға шұғыл түскен кезде бұл туралы хабар алатын үшке дейін сенімді байланыс тұлғасын алдын ала тіркей алады.

Жаңа қызмет адам апаттан кейін немесе денсаулығы күрт нашарлаған жағдайда жақындарына өзі хабарласа алмай қалған кезде көмек береді. Мұндай жағдайда жүйеде тіркелген сенімді тұлғаларға азаматтың ауруханаға түскені туралы хабарлама жіберіледі.

Бірінші вице-министрдің айтуынша, сервистің негізгі мақсаты – төтенше жағдайда адамның жақындарының маңызды ақпаратты уақытылы алуын қамтамасыз ету.

Сенімді адамды қалай тіркеуге болады?

eGov.kz порталында қызметті пайдалану үшін алдымен жүйеге авторизациядан өту қажет. Одан кейін «Ауруханаға түскен жағдайда хабарлау үшін сенімді байланыстарды тіркеу» сервисін таңдау керек.

Өтініш беру кезінде сенімді тұлғаның ЖСН-ін енгізіп, оның дербес деректерін өңдеуге және денсаулық жағдайына қатысты мәліметтерді беруге келісімін растау қажет.

Бір азамат үш адамға дейін сенімді байланыс ретінде тіркей алады. Сенімді тұлға кәмелетке толған және Мобильді азаматтар базасында тіркелген болуы тиіс.

Растау SMS арқылы жасалады

Өтініш жіберілгеннен кейін көрсетілген сенімді тұлғаға SMS хабарлама келеді. Ол тіркеуді растауы немесе одан бас тартуы керек.

Растау үшін жауап ретінде 911, ал бас тарту үшін 912 кодын жіберу қажет. Жауапты бес сағат ішінде беру керек.

Растау аяқталғаннан кейін өтініш беруші сұрауды электронды түрде бекітеді. Одан кейін ақпарат Денсаулық сақтау министрлігінің ақпараттық жүйесіне жіберіледі.

Бұдан былай азамат шұғыл түрде ауруханаға түскен жағдайда, тіркелген сенімді тұлғаға тиісті хабарлама жолданады.

eGov Mobile арқылы да тіркеуге болады

Сервисті eGov Mobile қосымшасы арқылы да пайдалануға болады. Ол үшін қосымшадағы «Мемлекеттік қызметтер» бөліміне кіріп, «Денсаулық сақтау» санатын таңдау қажет. Одан кейін ауруханаға түскен жағдайда хабарлау үшін сенімді байланыстарды тіркеу қызметін ашып, қажетті мәліметтерді енгізу керек.

Қызмет жеке тұлғаларға тегін көрсетіледі. Өтінішті Денсаулық сақтау министрлігінің ақпараттық жүйесі 10 минутқа дейінгі уақытта өңдейді.

Тіркеу мәртебесін eGov.kz порталындағы жеке кабинеттен немесе eGov Mobile қосымшасындағы «Хабарламалар – Жеке кабинет тарихы» бөлімінен тексеруге болады.

Жаңа сервис төтенше жағдай кезінде азаматтың жақындарына ақпаратты дер кезінде жеткізіп, медициналық көмек көрсетілгені туралы хабардар болуға мүмкіндік береді.