Дональд Трамптың қалтасы жарты миллиард долларға жұқарды

Әлем елдерінен импортталатын тауарларға жаңа кедендік тарифтердің енгізілуінен кейін, АҚШ президенті Дональд Трамптың байлығы 500 миллион долларға азайды, деп хабарлайды El.kz ақпарат агенттігі.

Forbes журналының мәліметінше, Трамптың жалпы байлығы 4,7 миллиард доллардан 4,2 миллиард долларға дейін төмендеген. Бұл – шамамен 10%. Бұл жағдай негізінен Трампқа тиесілі компания акцияларының құнсыздануынан болып отыр. Атап айтқанда, Trump Media and Technology Group компаниясының акциялары 8%-ға арзандап, нарықтық құны 170 миллион долларға азайған.

Сондай-ақ Трамптың жылжымайтын мүлік пен қызмет көрсету саласындағы бизнесі де шығынға ұшырағаны айтылып отыр.

Трамп 2 сәуір күні «өзара кедендік тарифтер» енгізілетінін жариялады. Бұл тарифтер әлемнің көптеген елін қамтыды. Қазақстанға қатысты кедендік алым мөлшері 27% болып бекітілді.