Димаш Құдайберген туралы үш тілдегі кітап оқырманға жол тартты

«Алматыкітап баспасы» DimashAli продюсерлік орталығының қолдауымен қазақстандық әнші Димаш Құдайбергеннің шығармашылық жолына арналған «Димаш Құдайберген: Шексіз музыка» атты ерекше кітап-альбомды таныстырды, деп хабарлайды El.kz интернет порталы.

Әлемнің түрлі аймақтарындағы миллиондаған тыңдарманды біріктіріп келе жатқан өнерпаздың кәсіби қалыптасу жолы бұл еңбекте кең әрі жан-жақты сипатталған.

Үлкен форматта жарық көрген, 289 беттен тұратын альбом оқырманға Димаштың шығармашылығына тереңірек үңіліп, оның өнер жолына көпқырлы көзқараспен қарауға мүмкіндік береді. Кітапқа мұрағаттық фотосуреттер, концерттік түсірілімдер, сондай-ақ орындаушының жеке естеліктері мен шығармашылық түсіндірмелері енгізілген. Бұл материалдар кез келген жанкүйерге оның кәсіби дамуын кезең-кезеңімен бақылап, бұрын жарияланбаған сәттерімен танысуға жол ашады.

Басылым құрылымы музыканттың өмірі мен шығармашылық өсуінің негізгі белестерін қамтитын тақырыптық бөлімдерден тұрады. Онда:

• өнерпаздың халықаралық деңгейде танылуы;

• отбасы мен шығармашылық бастаулары;

• әлемдік сахналарда өнер көрсетуі;

• мәдени жобаларға қатысуы;

• тыңдармандармен байланысы;

• шығармашылық эволюциясы туралы тараулар берілген.

Сонымен қатар альбомда сахна сыртындағы жұмыс үдерісі, маңызды оқиғалардың хронологиясы және шығармашылығының ішкі қырларын ашатын арнайы бөлімдер ұсынылған.

Кітап қазақ, орыс және ағылшын тілдерінде жарық көргендіктен, кең аудиторияға қолжетімді әрі қазақстандық мәдениетті халықаралық деңгейде насихаттауға қомақты үлес қоспақ.