Дейнерис, айдаһар және Темір тақ: Астанадағы ерекше қорған қайда орналасқан

Әйгілі «Тақтар ойыны» (Game of Thrones) сериалының атмосферасын сезіну үшін міндетті түрде шетелге барудың қажеті жоқ. Астанадағы Триатлон паркінде Вестерос әлемін еске түсіретін ерекше қорған орналасқан.

Мұнда алып айдаһар, Дейнерис бейнесі, Темір тақ, ортағасырлық қамал мен түрлі кейіпкерлердің мүсіндерін көріп, танымал фэнтези әлемінің бір бөлшегіне енгендей әсер алуға болады.

Айдаһар, Дейнерис және Темір тақ

Қорғанның ең көзге түсетін нысаны – қамал қабырғасына қоныстанған алып айдаһар мүсіні. Оның жанында сериалдағы басты кейіпкерлердің бірі, «Айдаһарлардың анасы» атанған Дейнерис Таргариеннің бейнесі орналасқан.

Мұнда сауыт киген жауынгерлер, ортағасырлық күзет мұнаралары, қамал қақпасы, қиял-ғажайып әлемді бейнелейтін түрлі құбыжықтар мен кейіпкерлердің мүсіндерін де көруге болады.

Келушілер ерекше қызығатын орындардың бірі – «Темір тақтың» инсталляциясы. Сериалда Жеті патшалықтың билігін білдіретін бұл тақ жүздеген қылыштан соғылған символ ретінде көрсетіледі. Астанадағы нұсқасы да сол идеяны жеткізіп, жанкүйерлердің суретке түсетін ең танымал фотозонасына айналған.

Winter Fest үшін салынған ерекше локация

Тақырыптық қорған 2020 жылдың соңында өткен Winter Fest қысқы фестивалі аясында тұрғызылған. Алғашқы күндері мұнда аниматорлар сериал кейіпкерлерінің образында келушілерді қарсы алып, түрлі қойылымдар ұйымдастырған. Бұл орын фестиваль аяқталғаннан кейін де сақталып, елорданың ерекше туристік нүктелерінің біріне айналды.

«Тақтар ойыны» неге әлемдік феноменге айналды?

Game of Thrones – америкалық HBO арнасы түсірген фэнтези жанрындағы сериал. Ол жазушы Джордж Р. Р. Мартиннің A Song of Ice and Fire («Мұз бен от жыры») романдар циклі негізінде түсірілді. Сериал 2011 жылы көрерменге жол тартып, 2019 жылы сегізінші маусымымен аяқталды.

Туынды күрделі саяси тартыстарымен, күтпеген оқиғаларымен, әсерлі шайқастарымен және есте қаларлық кейіпкерлерімен ерекшеленді. Жеті патшалықтағы Темір тақ үшін күрес, айдаһарлар, Ақ серуеншілер (White Walkers) мен түрлі әулеттер арасындағы текетірес сериалды әлемдегі ең танымал жобалардың біріне айналдырды.

Миллиондаған жанкүйердің сүйікті әлемі

«Тақтар ойыны» әлемнің түкпір-түкпірінде үлкен фанаттық қауымдастық қалыптастырды. Сериал эфирге шыққан жылдары әр жаңа бөлімді миллиондаған көрермен тағатсыздана күтетін. Кейіпкерлердің тағдыры әлеуметтік желілерде қызу талқыланып, олардың киім үлгілері мен сөздері поп-мәдениеттің бір бөлігіне айналды.

Бүгінде де сериалға арналған көрмелер, фестивальдер, косплей іс-шаралары ұйымдастырылып тұрады. Кейін осы әлемнің жалғасы ретінде «House of the Dragon» («Айдаһарлар үйі») сериалы жарық көріп, Таргариендер әулетінің тарихын баяндай бастады.