«Дайындық төмен». Маржықпаев федерацияларды сынады

Париж олимпиадасының қорытындысына арналған алқа отырысы өтіп жатыр, деп хабарлайды El.kz ақпарат агенттігі.

Отырысқа Президент Әкімшілігінің, Үкімет аппаратының, депутаттық корпустың өкілдері, сала ардагерлері, Олимпиада жүлдегерлері, өңірлік басқармалардың, федерациялардың, министрлікке бағынысты ұйымдардың басшылары, сонымен бірге БАҚ өкілдері қатысуда. Жиын барысында туризм және спорт министрі Париж олимпиадасында спортшылардың даярлығы нашар болғанын айтып, нәтижені жақсартуды талап етті.

Өздеріңіз білесіздер, кеше ғана мемлекет басшысы Қасым-Жомарт Кемелұлы Тоқаев Олимпиада жүлдегерлерімен кездесті. Спортшылар мен бапкерлерді мемлекеттік наградалармен марапаттады. Спортқа жүйелі қолдау көрсетіп, жан-жақты дамыған, салауатты ұлт қалыптастыру маңызды екенін атап өтті.

Жекелеген спорт түрлері бойынша нәтижені жақсарту керек. Біз үшін дәстүрлі саналатын спорт түрлері бар. Солардан дайындық төмен, нәтиже нашар болып шықты.

Былтыр Ханчжоуда Азия ойындары өтті. Азиадаға қатысқан спортшылардың 80 пайызы биыл Парижге барды. Ал Ханчжоудан ұлттық құраманың қандай нәтижемен келгені бәрімізге белгілі. Тарихтағы ең нашар Азиада болды. Соған қарамастан аз уақыт қалса да, жағдай жасадық. Бірақ Париждегі нәтижені өздеріңіз біліп отырсыздар, - деді министр.