Даниал Ахметов ШҚО әкімі қызметінен босатылды

Мемлекет басшысының Жарлығымен Даниал Кенжетайұлы Ахметов Шығыс Қазақстан облысының әкімі лауазымынан босатылды. Бұл туралы Ақорданың баспасөз қызметіне сілтеме жасай отырып El.kz ақпарат агенттігі хабарлайды. 

Былтыр 11 маусымда Мемлекет басшысы оның өкілеттігін бір жылға ұзартқан еді. 

Даниал Ахметов 15 маусымда 69 жасқа толды. Әр жылдары ол премьер-министр, қорғаныс министрі, Еуразиялық экономикалық комиссияның энергетика және инфрақұрылым жөніндегі алқасының мүшесі болды.

1992 жылдан 1993 жылға дейін Екібастұз қалалық әкімшілігін басқарды. Кейін Павлодар, Солтүстік Қазақстан облыстарының әкімі қызметтерін атқарды. 

Бұған дейін Абай облысындағы орман өртіне байланысты бас прокурордың орынбасары Жандос Өмірәлиев төтенше жағдай ісі бойынша бірқатар лауазымды тұлға тергелетінін айтқан. Олардың ішінде төтенше жағдайлар министрі Юрий Ильин, Абай облысының әкімі Нұрлан Ұранхаев, Шығыс Қазақстан облысының әкімі Даниал Ахметов, экология және табиғи ресурстар министрі Зульфия Сүлейменова бар.