Петропавлда Тұңғыш Президент залы ашылды

Петропавлда Тұңғыш Президент залы ашылды, деп хабарлайды BNews.kz тілшісі. Бүгін, Қазақстан Республикасының Тұңғыш Президенті күні қарсаңында облыстық тарихи-өлкетану музейінде жаңа Тұңғыш Президент залы ашылды. Залдың ашылуына облыс әкімі Серік Біләлов, ардагерлер қатысты.

Мемлекет басшысының әр жылдардағы өмірі мен қызметінен сыр шертетін экспозиция 6 бөлімнен тұрады. Н.Назарбаевтың отбасы, мектептегі жылдары, еңбек жолының басталуы, қалыптасу кезеңі туралы фотосуреттер қойылған. Жас елорда – Астананың құрылысына үлкен көңіл бөлінген. Залдың ортасында «Бәйтерек» ілініп тұр.

Президенттің тағдыры Қазақстанның кейінгі жылдардағы тарихымен үндес. Залда тамаша экспонаттар да бар.

Теледидардан «ҚР Президенті Телерадиокешені», «Қазақфильм», «Хабар», «Қазақстан-Петропавл» телеарналары түсірген фильмдерді көруге болады.

Музей қызметкерлері Президенттің облысқа жасаған сапарлары туралы фотоальбом жасады.