Жас дарындар мемлекеттік қолдаудан шет қалмасын...

- Шахматтан бар-жоғы сегіз-ақ жасында Азия чемпионы атанып, он жасында әлемдік чемпионаттарда топ жарған қаршадай қызымыз Жансая Әбдімәлікке не себептен мемлекеттен қолдау көрсетілмейді, - деп сөз бастады депутат Алдан Смайыл.
- Бұл Қазақстанның, ұлтымыздың мақтанышы ғой. Шет елден легионерлер әкеле бергенше, осындай жас дарын, нағыз таланттарымызға қолдау көрсетуді қолға алуыңызды сұраймын. Ол неге өз өнері арқылы елдің, мемлекеттің атын шығаруда ата-анасы мен туыстарының немесе демеушілердің қолдауына мұқтаж болу керек. Бұл елдігімізге сын емес пе? – деп көптің көкейіндегі қыжылын білдірді.
Мұның артынша сөз сұраған депутат Гүлмира Исінбаева да жас шахматшы Жансаяның жағдайын айтып, бір шындықтың шетін шығарды.
- Мен осы мәселені көтеріп, сіздің агенттікке хат жазғанымда мынадай жауап алдым: «Жансая Әбдімәлік алдымен шахматтан әлем чемпионы болсын, сосын агенттік көмек көрсетіп, қаржыландыратын болады» делінгені көңіл құлазытады. Бұл не масқара енді?!. Тіпті, ұят қой, - деп жылармандай халге түсті депутат ханым.
Сөйтіп, бүгінде әкесінің жаттықтыруымен, туыстарының демеуімен жарысқа қатысу үшін жылына бар-жоғы 7 рет қана жоғары дәрежелі жаттығу өткізетін Жансаяға мемлекеттік тұрғыдан көмек көсетіп, қаржыландыру арқылы жаттығу санын екі есеге дейін көтеруді ұсынды.
Сондай-ақ, жиын барысында Қажымұқан Мұңайтпасұлы секілді тау тұлғаларымыз бен жоғарыда аты аталған Жансая секілді дарындарымыздың ұлттық тұрғыда ұлықталмай, кеңінен қоғам арасында насихатталмай жатқаны да тақырып аясынан тыс қалмады.

Нұрлыбек ДОСЫБАЙ