Популяциялық генетика зертханасында қазіргі қазақтардың ДНК-сы зерттеледі

Генетика және цитология институтында ашылатын Популяциялық генетика зертханасы қазіргі қазақтардың ДНК-сын зерттейді. Бұл жөнінде бүгін Ұлттық тарихты зерделеу мәселелері жөніндегі ведомствоаралық жұмыс тобының III отырысында ҚР Білім және ғылым вице-министрі Мұрат Орынханов мәлім етті, деп хабарлайды BNews.kz тілшісі.

Зертхана Қазақстанның қазіргі халқының популяциялық-генетикалық құрылымдарын палеогенетикалық зерттеулер мен зерделеуге бағытталған.

«Зертханада археологиялық қазбалар барысында табылған адам қаңқаларының палеогенетикасы, қазіргі қазақтардың ДНК-сын жинау және талдау, жануарлардың шынайы қазақы тұқымдарының шығуын зерделеу сияқты жұмыстар жасалады», - деді М.Орынханов.

Зертханада 20 адам жұмыс жасайды. Бастапқы кезеңде бір топ маман Германиядағы Макс Планк институтында Сванте Паабо зертханасында бір жыл тәжірибе жинақтап қайтады.