"Барыс" "Локомотивті" тізе бүктірді

Жаңа басталған Құрлықтық хоккей лигасының екінші турында Астананың "Барысы" өз алаңында Ярославль командасымен кездесіп, кезекті жеңісіне қол жеткізді.

Тартысты өткен ойын 5:3 есебімен аяқталды.
Есепті алғаш болып қонақтар ашқан. Гол авторы Микелис Редлихс. Араға сегіз минут салып Михаил Рахманов есепті теңестірді.
Мұнан кейін Дастин Бойд астаналықтарды алға шығарғанымен, алғашқы кезеңнің соңғы секундтарында есеп қайта теңесті. Дегенмен, ойын соңына дейін Константин Руденко, Найджел Доус және Максим Спиридоновтар бір-бір шайбадан қарсылас команданың қақпасына соғып, "Барысқа" түбегейлі" жеңісті алып келді.
Айта кетейік, бұған дейін астаналықтар өз алаңында Череповецк қаласының "Северсталь" командасын қабылдап, 10:1 есебімен ойсырата жеңген болатын. Ендігі ойын ертең Астанада өтеді. Жерлестеріміз Құрлықтық хоккей лигасындағы азулы қарсыластарының бірі СКА командасымен бақ сынасатын болады.

Baq.kz