Елордада Отбасы күніне арналған халықаралық конференция өтіп жатыр

Елордада Отбасы күніне арналған халықаралық конференция өтіп жатыр, деп хабарлады Bnews.kz тілшісі.

«Отбасы. Ұрпақтардың әлеуметтік әділеттілігі» деп аталатын халықаралық конференция Н.Назарбаевтың «Қазақстан - 2050 стратегиясы. Қалыптасқан мемлекеттің жаңа саясаты бағыты» атты Қазақстан халқына Жолдауы аясында өтіп отыр. Шарада ҚР Парламентінің депутаттары, мемлекеттік органдардың басшылары, қоғам қайраткерлері, шығармашылық интеллегенция, денсаулық сақтау және ғылым, білім беру саласының өкілдері бас қосты. Сондай-ақ көрші мемлекеттер Ресей, Беларусь және Литвадан арнайы әйелдер делегациясы келді.

«Республикалық әйелдер кеңесі» ҚБ өткізіп отырған шара отбасы мәртебесін арттыруға бағытталған. Онда саяси, заңнамалық және әлеуметтік-экономикалық мәселелер қозғалып, қоғамдағы жанұяның орны мен отбасылық құндылықтар жайлы айтылуда.

Еске сала кетсек, 8 қыркүйекте тұңғыш рет Қазақстанда Отбасы күні аталып өтеді. Мемлекет басшысының Жарлығымен бұл күн әр жылдың қыркүйек айының екінші жексенбісінде аталып өтетін болады. Осыған орай биыл елімізде түрлі мерекелік шаралар өткізілмек.