"Селтик" - "Шахтер": 3-0

Шотландияның "Селтигі" дегеніне ақыры жетті. Еуропа чемпиондар лигасының іріктеу сынында Қарағандының "Шахтер" клубын қабылдаған "Селтик" 3-0 есебімен жеңіске жетіп, турнирдің топтық кезеңіне жолдама алды.

Гол авторлары: Крис Коммонс (45 минут), Гиоргос Самарас (48 минут) және Джеймс Форрест (90 минут).
Соңғы шешуші минутта өз қақпаларына гол жіберіп алу - Ұлттық құраманың да, ел командаларының да әдетіне айналғандай. Қорғаныста тамаша ойнаған "Шахтер" ойыншылары да шотландықтардан шешуші голды төреші қосқан қосымша уақытта жіберіп алды.
Дей тұра, "Шахтер" қазақ футболында бұрын-соңды болмаған жетістікке қол жеткізіп отыр. Бұл ретте, бас бапкер Кумыков пен команда ойыншыларының ерлігін ерекше атап өткен жөн. Өйткені, отандық командалар арасынан әлі бірде бірі қарағандылықтар секілді "алысқа шаппаған". Енді жерлестеріміз Еуропа лигасының топтық кезеңінде құрлық мықтыларымен күш сынасатын болады.
Ал, Қазақстанның тағы бір командасы "Ақтөбе" ертең сырт алаңда Киевтің "Динамосымен" өзара мықтыны анықтамақ. Жеңгені "Шахтер" секілді Еуропа лигасының топтық кезеңіне жолдама алады.
Айта кетейік, Ақтөбеде өткен ойында жерлестеріміз қонақтарға 2-3 есебімен жол берген болатын.

Baq.kz