Қызылорданың 195-жылдығына орай 23 спорт алаңы ашылады

Қызылорданың 195-жылдығы құрметіне қала шағын аудандарында 23 спорт алаңы ашылады. Бұл туралы Bnews.kz тілшісіне қала әкімінің баспасөз хатшысы Балдырған Мәмен хабарлады.

Қызылоданың мерейтойы қарсаңында облыс орталығының 23 жерінде бірден ашылатын спорт алаңдарының тұсаукесері болады. Бұл Қызылорданың балаларына мерекелік тарту болмақ, ал мерекенің өзі қыркүйек айында аталып өтеді.
«Қазір мерейтойлық шараларға қызу дайындық қолға алдық, облыс орталығын белсенді түрде абаттандырып жатырмыз. Жұмысшылар қаланың 27 саябағы мен жолдарында түрлі-түсті құлпырған гүлдер отырғызады. Жалпы, мерекеге дейін қаланың қырық көшесінде шамдар жөнделеді. Қызылорданың 195-жылдығы қарсаңында орталық «Жібек жолы» даңғылын қайта жөндеу жұмыстары толық аяқталады», - деп сендірді Б.Мәмен.