Н.Назарбаев: «Менің алғашқы пәтерім 27 шаршы метр болған...»

Бүгін теміржолшыларға пәтер кілтін табыс еткен ҚР Президенті Нұрсұлтан Назарбаев кезінде өзі де қатардағы қызметкер ретінде алғаш пәтер алғандағы қуанышын еске алды, деп хабарлайды BNews.kz тілшісі. 

«Бүгін баспаналы болған адамдардың қуанышын түсінемін. Кезінде мен де қарапайым жұмысшы болғанмын, сондықтан баспана алудың қандай бақыт екенін білемін. Жақсы жұмыс істеген металлург ретінде маған бес қабатты үйден 27 шаршы метр ауданды құрайтын пәтер берілген еді. Ол мен үшін үлкен бақыт болды..»,- деді Елбасы теміржолшылар алдында. 

Президент жастарды бүгін де бірлікке шақырып, ел үшін еңбек ету керектігін айтты. 

«Еліміз үшін барлығымыз жабылып жұмыс істеп, еңбек қоғамын құруымыз керек. Жұмыс істеген адам бәріне қол жеткізе алады. Жастарымызды жұмысқа баулуымыз керек. Бекер тапқан нәрсе су сияқты бекер кетеді. Бүгін пәтер алған адамдар осының барлығына еңбегі арқылы қол жеткізді. Барлығымыз бір адамдай еңбек етіп, қазақтың да бірлігін, көп ұлтты Қазақстанның да бірлігін сақтауымыз керек», - деді Н.Назарбаев.