Қазақстандықтардың 6-7% ғана кредитті жөндеу жұмыстарына алады

Қазақстанның екінші деңгейлі банктерінің түрлі мақсаттарға берген 100% кредитінде құрылыс пен жылжымайтын мүлікке жөндеу жүргізу үшін берілген кредит үлесі 2012 жыл мен 2013 жылдың алғашқы жартыжылдығында 6 мен 7% аралығында қалықтады. Бұл туралы BNews.kz тілшісіне берген сұхбатында Қазақстан жылжымайтын мүлік федерациясының президенті Ермек Мүсірепов мәлім етті. 

Сондай-ақ ол дағдарыстан кейінгі кезең бойы жылжымайтын мүлік құрылысы мен жөндеу жұмыстарын бөлшек кредиттеуді банктің қаржыландыруы бір орында тұралап қалғанын атап өтті. Оның айтуынша, жөндеу жұмыстарының құны қызу бәсекелестік салдарынан құрылыс қызметі мен құрылыс материалдарының арзандауынан төмендеп кеткен. 

«Сондай-ақ қазақстандықтардың басым бөлігі пәтерлеріне жөндеу жасау үшін кәсіби әрі көпбейінді құрылыс компанияларының қызметіне жүгінетінін атап өту қажет. Сонымен қатар, үйге жеңіл жөндеу жұмыстарын қазақстандықтар уақыт, ынта болған жағдайда және үнемдеу мақсатында өз күшімен де жасай алатынын айтпай кетуге болмайды», - деп қорытты Е.Мүсірепов.