Журналистер арасында футболдан турнир өтуде

Бүгін Астана қаласында Журналистер күніне орай "Алатау" спорт кешенінде "Қазконтент" АҚ ұйымдастыруымен дәстүрлі футбол турнирі өтуде.

Аяқ доп додасына «Хабар» агенттігі», «24.kz», «Қазақстан Ұлттық арнасы», «Керекинфо» порталы, «Астана ақшамы» газеті, «Қазақ радиосы», «Қазмедиа» орталығы, «Қазконтент» АҚ секілді 8 команда қатысуда.

Турнирдің бірінші кездесуіне «Қазақстан Ұлттық арнасы» мен «Қазақ радиосы» командалары шықты. Тартысты ойын көрсеткен «Қазақ радиосы» 1:3 есебімен келесі кезеңге өтті.

Одан кейін алаңға «Астана ақшамы» газеті мен «Керекинфо» порталының құрама командалары шықты. Бұл ойында 4:1 есебімен «Астана ақшамы» басымдық танытты.

Теңбіл доп додасында, үшінші болып кездескен «Қазконтент» АҚ жігіттерімен «24.kz» ойыншылары тартысты ойын көрсетіп 0:3 есебімен «24.kz» командасы жеңіске жетті.

Соңғы кездесу "Қазмедиа" мен "Хабар"-дың ала доп шеберлері бақ сынасты. Ойын 1:1 есебімен тең түсіп, пенальти белгіленді. Нәтижесінде, "Хабар" ойыншылары мергендік танытты. Есеп 3:2.

Жартылай финалға жолдама алған "Қазақ " радиосы мен "Астана ақшамының" азаматтары алдымен сайысқа түсті. Тең түскен қос команда пенальти тебісіп, "Астана ақшамы" 3:2 есебімен алға шықты. Жартылай финалда екінші болып кездесу өткізген "Хабар" мен "24.kz" командалары арасында өткен тартысты ойын "Хабар" журналистерінің пайдасына шешілді. Есеп 4:0.

Енді үшінші орынға талас "24.kz" пен "Қазақ радиосы" арасында ұйымдастырылды. «Қазақ радиосының» құрама командасын 0-1 есебімен жеңген «24.kz» жігіттері үшінші орынды меншіктеді. Ал енді қазіргі кезде «Хабар» мен «Астана ақшамы» командалары 1-ші мен 2-ші орын үшін таласқа түсіп жатыр.

Baq.kz