Сириядағы Бүкіләлемдік мәдени мұраға жататын алты жәдігерге қатер төніп тұр

ЮНЕСКО Бүкіләлемдік мұраға жататын сириялық барлық алты ескерткішті де қатер төніп тұрған нысандардың тізіміне енгізді.

Бұл жайында Франс Пресс ақпарат агенттігі хабарлайды.

Бүкіләлемдік мәдени мұралар қатарына жататын сириялық ескерткіштер мыналар: Дамаскідегі көне қала, Алепподағы көне қала, Пальмирдің тарихи ескерткіштері, Босрадағы көне қала, Крак де Шевалье мұнарасы, Салахаддин қорғаны және Солтүстік Сирияның көне ауылдары. Бұлардың бәріне қазір қауіп төніп тұр.

«Сириядағы шиеленістің кесірінен бұл құнды жәдігерлердің бүтіндей сақталуына ешкім кепілдік бере алмайды», - дейді ЮНЕСКО.

Сириядағы шиеленіс 2011 жылдың наурыз айынан басталып, әлі жалғасып келеді. Осы уақыт аралығында елде 90 мың адам қаза болды. muslim.kz сайтының жазуынша, сәуір айында тағы бір қақтығыстың салдарынан 8 ғасырға тиесілі көне омеядтық мешіттің мұнарасы құлады.

ҚазАқпарат.