«Бұрқасын-2013» шаңғышылар фестивалі басталады (видео)

Астанада алдағы сенбі күні «Бұрқасын-2013» шаңғышылар фестивалі басталады.

Осымен 13-рет өткізіліп отырған дәстүрлі додаға 2 мыңнан астам қала тұрғыны қатысады деп жоспарлануда. Бұл жөнінде Астанада өткен арнайы баспасөз мәслихатында айтылды. Аталған бағдарлама бойынша балалар, жасөспірімдер, ересектер және ардагерлер арасында шаңғы жарысы өтеді. Олар бір, үш және бес шақырымдық жарыс жолдарында бақтарын сынайды. Сонымен қатар, биылғы фестиваль бағдарламасына күш сынасу, гір тасын көтеру және арқан тартыс сияқты ұлттық спорт түрлері қосылған. Бұқаралық спортты дамыту мақсатында өткізілетін додаға қатысушылар саны жыл санап артып келеді дейді ұйымдастырушылар.

Самат АМЕНГЕЛДІҰЛЫ, қалалық туризм және спорт басқармасының бөлім бастығы:

- Біз қала тұрғындары үшін бәрін дайындаймыз. Адамдар жай келіп, қатыса беруіне болады. Біздің басты мақсатымыз - елді спортқа баулу.