Былтыр 728 мыңнан астам адам АӘК алды

2022 жылы атаулы әлеуметтік көмек 141,5 мың отбасынан 728,7 мың адамға тағайындалды, деп хабарлайды El.kz Еңбек және халықты әлеуметттік қорғау министрлігіне сілтеме жасап.

Бұл мақсатқа бюджеттен 59,5 млрд теңге бөлінген.

АӘК отбасының әрбір мүшесіне жан басына шаққандағы орташа табысы өңірлік ең төменгі күнкөріс деңгейінің 70%-ынан төмен азаматтарға тағайындалады.

Бұдан басқа АӘК көрсету тетігін іске асыру шеңберінде 2020 жылдан бастап еліміздің барлық өңірлерінде аз қамтылған отбасылардан шыққан мектеп жасына дейінгі балаларды заттай түрдегі кепілдік берілген әлеуметтік топтамамен қамтамасыз ету бойынша жұмыс жүргізілді.

2022 жылы 1 жастан 6 жасқа дейінгі шамамен 204,6 мың АӘК алатын балаға азық-түлік және тұрмыстық химия жиынтығы түрінде КӘТ тағайындалды.

Азаматтардың КӘТ-ті заттай форматтан ақшалай форматына ауыстыру туралы ұсыныстарын ескере отырып, 2023 жылдан бастап мектеп жасына дейінгі балаларға арналған КӘТ-ті монетизациялау жүзеге асырылды. Өнімдер мен тұрмыстық химия жиынтығын ұсынудың орнына әр балаға 1,5 АЕК мөлшерінде ай сайынғы қосымша төлем белгіленді. Осылайша, ата-аналарға балалардың жеке қажеттіліктеріне қарай өз бетінше азық-түлік сатып алуға мүмкіндік беріледі.

Бұдан басқа 2023 жылғы 1 қаңтардан бастап Қазақстанда мемлекеттік қолдау алу құқығын автоматты режимде белгілеуге мүмкіндік беретін Отбасының цифрлық картасы енгізілді. АӘК тағайындау критерийлеріне сәйкес болған кезде ОЦК проактивті форматта мемлекеттік қызметті алу ұсынысымен әлеуетті алушыға автоматты түрде SMS-хабарлама жібереді. Алаяқтық тәуекелін болдырмау мақсатында 1414 бірыңғай байланыс орталығынан келіп түскен SMS-ке жауап беру қажеттігін атап өтеміз, - делінген ведомство хабарламасында.

Азаматтар АӘК тағайындауға өтінішті тұрғылықты жері бойынша халықты жұмыспен қамту орталығына немесе Электрондық үкімет порталы (egov.kz) арқылы бере алады.