Былғары қолғап шеберлері Олимпиадаға дайындалуда

Алматы облысында Қазақстанның бокстан ерлер құрама командасы үш аптаға лайықталған жалпы денешынықтыру жаттығуларын бастады.   

Командалық ұжым өте тату. Былғары қолғап шеберлерінің айтуынша, күнделікті жаттығуларды тыңғылықты орындап, жаңа белестерді бағындыруға еш кедергі жоқ. Жоспарға сәйкес Олимпиадаға дейін команда мүшелеріне Украинаның еңбек сіңірген бапкері Остьянов Вадим Наумович консультация жүргізеді.

Түскі ас алдында команданың бапкерлер штабының басшысы Мырзағали Айтжанов туған күн иелерін құттықтау үшін ұжымды бір дастархан басына жинап, әрқайсысына бағалы сыйлықтар үлестірді. Былғары қолғап шеберлері де өнерден құр алақан емес. Боксшылар Жәнібек Әлімханұлынан гитарамен ән салып беруіне қолқа салды.

Құрмет көрсету, сыйластық, өнер секілді биік ұғымдарға да уақыт таба білетін құрама команданың AIBA Академиясындағы жаттығулары күн сайын қыза түсуде.

Әзірлеген Бақытгүл АБАЙҚЫЗЫ

Суреттерді Қазақстан бокс федерациясының

 фотографы Данияр МАЙЛЫБАЕВ түсірді