Бүгін Ташкенттегі әлем чемпионатының күндізгі сессиясында екі боксшы сынға түседі

Бокстан Ташкентте өтіп жатқан әлем чемпионатының алтыншы жарыс күнінде Қазақстан ұлттық құрамасынан екі боксшы жекпе-жекке шығады, деп хабарлайды El.kz ақпараттық агенттігі. 

Құраманың қос өкілі күндізгі сессия аясында Астана уақыты бойынша сағат 15:00-де шаршы алаңға көтеріледі.

Б рингіндегі үшінші жұпта 1/16 финалда 67 келіде жұдырықтасатын Дулат Бекбауов румыниялық Андрей Мустетпен шеберлік байқасады.

Ал ұлттық құрама капитаны тараздық Асланбек Шымбергенов 71 келі оныншы жұпта өнер көрсетеді. Отандасымыз 1/16 финалда Тринидада және Тобаго боксшысы Аарон Принспен өзара мықтыны анықтайды. 

Бұған дейін әлем чемпионатында қазақ боксшылары Талғат Сырымбетов (60 келі), Санатәли Төлтаев (63,5 келі) және Айбек Оралбай (92 келі) есе жіберіп, Өзбекстандағы дүниежүзілік жарыстағы жолы аяқтаған болатын.