BMW 5 Series түбегейлі өзгереді: алғашқы суреттері жарияланды

BMW 5 Series седанының жаңартылған нұсқасы туралы жаңа мәліметтер пайда болды. Желіде жарияланған суреттерден автомобильдің сыртқы дизайнын бұрынғыдан да анық көруге болады. Рестайлингтен өткен модель Neue Klasse стиліндегі жаңа фаралармен, өзгертілген алдыңғы бөлікпен және жаңартылған интерьермен ерекшеленуі мүмкін.

BMW 5 Series тарихы 1972 жылдан басталады. Сол жылы E12 индексімен алғашқы буын жарық көрді. Қазір конвейерде 2023 жылдың көктемінде таныстырылған, зауыттық G60 индексі бар сегізінші буын тұр. Модельді жаңарту уақыты жақындағандықтан, оның сынақ үлгілері соңғы айларда қоғамдық жолдарда бірнеше рет байқалды.

Жақында желіде жаңа BMW 3 Series таныстырылымы кезінде түсірілген кадрлар да жарияланды. Сапасы төмен болғанымен, суреттерден жаңартылған «бестіктің» алдыңғы бөлігіндегі өзгерістерді байқауға болады.

Neue Klasse стиліндегі фаралар

Жаңартылған BMW 5 Series алдыңғы оптикасының дизайны брендтің Neue Klasse топтамасындағы жаңа модельдерге ұқсас болуы мүмкін. Сонымен бірге радиатор торының дәстүрлі «танаулары» қазіргі BMW автомобильдеріне тән пішінін сақтайды деп күтілуде.

Алдыңғы бампердің шеттеріне тік сәндік элементтер орнатылады. Орталық ауа қабылдағышы кузов түсіне боялған көлденең бөліктің көмегімен екіге бөлінеді. Ұқсас шешім радиатор торының дизайнында да қолданылуы мүмкін.

Бұл жаңартуды жай ғана косметикалық өзгеріс деуге келмейді. Себебі автомобильдің капоты толығымен жаңарып, енді фаралар мен радиатор торынан бөлек орналасады. Алдыңғы қанаттардың да өзгеретіні болжанып отыр. Әдетте рестайлинг кезінде бұл бөлшектер сол күйінде қалатынын ескерсек, BMW дизайнерлері модельдің сыртқы келбетін едәуір өзгертуге ниетті.

Артқы бөліктің камуфляжсыз суреттері әзірге жарияланған жоқ. Дегенмен мұнда өзгерістер салыстырмалы түрде аз болады деп күтіледі. Атап айтқанда, жаңа графикасы бар, біртұтас көлденең жолақтар түрінде орындалған артқы шамдар мен өзгертілген бампер пайда болуы мүмкін.

Техникалық мүмкіндіктері қандай болады?

Қазіргі BMW 5 Series CLAR платформасына негізделген. Бұл архитектура модельдің алдыңғы буынында да қолданылған.

Қозғалтқыштар гаммасы бензин және дизель нұсқаларын, сондай-ақ толық электрлі күштік қондырғыларды қамтиды. Рестайлинг кезінде осы нұсқалардың кейбірі техникалық тұрғыдан жетілдірілуі ықтимал.

Әсіресе электрлі модификациялардың мүмкіндіктері қызығушылық тудырады. Жаңартылған BMW 7 Series үлгісіне ұқсас, жетілдірілген аккумуляторларды қолдану арқылы электрлі нұсқалардың көрсеткіштерін жақсарту мүмкіндігі қарастырылуы мүмкін. Алайда аккумулятор сыйымдылығы, жүріс қоры және қуат көрсеткіштері туралы ресми мәлімет әзірге жоқ.

Сонымен қатар бизнес-класс седанының салоны да айтарлықтай өзгеруі ықтимал. Жаңа интерьер брендтің соңғы модельдеріндегі дизайн шешімдеріне негізделіп, мультимедиа жүйесі мен цифрлық интерфейстерді жаңартуды қамтуы мүмкін.

Тұсаукесері қашан өтеді?

Жаңартылған BMW 5 Series-тің ресми тұсаукесері алдағы айларда өтуі мүмкін. Әзірге өндіруші премьераның нақты күнін жариялаған жоқ.

Айта кетейік, BMW жуырда бренд тарихындағы алғашқы iX4 кроссоверін таныстырды. Бұл компанияның модельдер қатарын жаңарту және электрлі автомобильдер бағытын дамыту жұмыстарын жалғастырып жатқанын көрсетеді.

Жаңартылған BMW 5 Series-тің нақты техникалық сипаттамалары мен жабдықталуы ресми таныстырылым кезінде белгілі болады. Ал әзірге жарияланған суреттер модельдің сыртқы дизайны едәуір өзгеретінін аңғартады.