Билікке жаңа буынның келетін кезі болды – Аңсаған Мұстафа

Қазақстандық суретші Аңсаған Мұстафа бүгінгі Парламент Мәжілісі мен мәслихат депутаттарының сайлауына қатысты пікірін білдірді, деп хабарлайды El.kz акпараттық агенттігі.

Сайлауға қатысу барлығымыздың міндетіміз. Өйткені ол біздің еліміздің болашағы үшін жасайтын таңдауымыз. Биылғы сайлау бұрын өтіп жүрген сайлауларға қарағанда ерекше. Қатысып жатқан кандидаттар өте көп. Олардың ішінде партиялар да, өзін-өзі ұсынып жатқан отандастарымыз да бар. Бұл қуантарлық жайт. Өз басым Қазақстанды жақсартқысы келетін әрбір жанды жақсы көремін және құрметтеймін. Осы жолы өтіп жатқан сайлауға менің достарым да қатысып жатыр. Еліміз үшін адал қызмет ететін тұлғалар депутаттыққа сайланса екен деймін, - деді ол.

Сондай-ақ Аңсаған Мұстафа депутаттар құрамынан кімді көргісі келетінін де айтты.

Көптеген жылдар бойы билікті үлкен буын басқарып келеді. Менің ойымша ендігі кезек жаңа буынға келген сияқты. Олар депутаттыққа сайланатын болса, болашаққа деген жаңа қадамдар жасалар еді, - деді суретші.