Биатлоннан әлем чемпионаты: Халықаралық федерация Қазақстан дайындығын жоғары бағалады

Бұл жөнінде Мәдениет және спорт министрі Асхат Оралов фейсбук парақшасында бөліскен, деп жазады El.kz ақпараттық агенттігі.

Министр жастар мен жасөспірімдер арасында биатлоннан әлем чемпионаты өтіп жатқан Щучинск қаласына барып, жеңімпаздарды марапаттап қайтқан.

"Қазақстан мұндай чемпионатты алғаш рет қабылдап отыр және алғашқы күннен бастап шын мәнінде әлемдік деңгейдегі іс-шараны ұйымдастыра алғанымыз қуантады. Ал қысқы спорт түрлері бойынша олимпиадалық даярлау орталығы ауқымды турнирлер өткізуге қабілетті екенін тағы да көрсетті. Жарыстар аясында туристік инфрақұрылымның дамитыны анық. Осы ретте, дәл осы күндері чемпионатқа келген шетелдік қатысушылар мен жанкүйерлер ағынының арқасында туристік нысандар, қаланың қонақ үйлері толық қамтылған айта кеткен жөн" - делінген жазбада.

Сондай-ақ министр байрақты додада шетелдік жанкүйерлер де көп болғанын айтады. АҚШ, Норвегия секілді әлемнің түкпір – түкпірінен спорт жанкүйерлері келген. Жарыстың құрметті қонағы, аты аңызға айналған қазақстандық шаңғышы Владимир Смирнов болды.