Басына диван құлады: Ақтаудағы қайғылы оқиғаға қатысты жаңа мәлімет белгілі болды

Ақтауда бір жарым жылдан аса уақыт бұрын болып, салдарынан жергілікті тұрғын қаза тапқан қайғылы оқиғаға қатысты жаңа мәлімет белгілі болды, деп хабарлайды El.kz ақпарат агенттігі.

2023 жылғы қаңтарда Маңғыстау облысының Полиция департаменті Қылмыстық кодекстің 104-бабы 1-бөлігінде көзделген іс бойынша («Абайсызда қазаға ұшырату») соталды тергеп-тексеруді бастады. 2023 жылғы 14 қыркүйекте қылмыстық іс жүргізу кодексінің (ҚІЖК) 45-бабы 7-бөлігі 1-тармағына сәйкес соталды тергеп-тексеру нәтижелері бойынша күдікті анықталмағандықтан тергеп-тексеру тоқтатылды. Ақтау прокуратурасы шешіммен келісті.

Алайда, Tengrinews.kz тілшісінің анықтауы бойынша, 2024 жылғы 21 маусымда Бас прокуратура істі тоқтата тұру туралы шешімнің күшін жойып, оны ҚР ҚК-нің 99-бабы 1-бөлігіне («Адам өлтіру») қайта саралаған. Тиісті нұсқаулар берілген.

Соталды тергеп-тексеруді жүргізгені үшін Маңғыстау облысының Полиция департаментіне полиция органдары басшыларының қызметін бағалау туралы мәселені қарастыра отырып, прокурорлық қадағалау актісі енгізілді. ҚІЖК-нің 201-бабының талаптарына сәйкес қазіргі уақытта соталды тергеп-тексерудің қандай да бір басқа деректері жарияланбайды, - деп хабарлады Бас прокуратураның соталды тергеп-тексеру және қылмыстық қудалау заңдылығын қадағалау қызметі бастығының орынбасары Елдос Килымжанов.

Айта кетейік, 2023 жылдың қаңтарында Ақтауда жергілікті тұрғынның басына диван құлаған болатын. Ес-түссіз күйде, мойын омыртқасы сынған жәбірленуші Маңғыстау облыстық ауруханасына шұғыл жеткізілген. Өкінішке қарай, ер адам 2023 жылдың тамызында қайтыс болды.