Азия чемпионаты: Қазақстан құрамасы су добынан қола жүлде жеңіп алды

Үндістанның Ахмедабад қаласында өткен су спорты түрлерінен Азия чемпионатында Қазақстанның ерлер құрамасы қола медаль иеленді, деп хабарлайды El.kz интернет порталы.

Үшінші орын үшін өткен кездесуде қазақстандық ватерполшылар Жапония құрамасын 16:14 есебімен жеңіп, құрлық біріншілігінің үздік үштігіне енді.

Бұл ойын барысында біздің спортшылар алғашқы кезеңдерде қарсыласқа жол берсе де, кейін матчтың бағытын өз пайдасына өзгертіп, сенімді жеңіске жетті.

Осы нәтижемен Қазақстанның ерлер құрамасы турнирдің қола жүлдегері атанды. Ал чемпиондық атақты Қытай құрамасы иеленсе, екінші орынды Оңтүстік Корея спортшылары алды.

Су спорты түрлерінен өткен Азия чемпионатында қазақстандық спортшылар барлығы 23 медаль жеңіп алды:

• Жүзу — 1 алтын, 5 күміс, 4 қола
• Көркем жүзу — 7 алтын, 2 күміс, 2 қола
• Ватерпол — 2 қола (ерлер және әйелдер құрамасы)
• Жалпы командалық есеп бойынша Қазақстан екінші орын алды.

Бірінші орынды Қытай (54 медаль) иеленсе, үшінші орында Жапония (20 медаль) орналасты.