Азиада: Қазақстан құрамасының қоржынына екі медаль түсті

Қазақстан құрамасы фристайл-акробатикадан Қытайдың Харбин қаласында өтіп жатқан 2025 жылғы Азия ойындарында күміс жүлдеге қол жеткізді, деп хабарлайды El.kz ақпарат агенттігі.

Біздің спортшылар аралас командалар арасындағы сайыста екінші орынға ие болды. Бұл бағдарламада ел намысын Аяна Жолдас, Шерзод Хаширбаев және Асан Асылхан қорғады.

Қорытынды есепте қазақстандық спортшылар 235,39 ұпай жинап, осы көрсеткіш оларға күміс медаль алып келді. Бірінші орынды Қытай иеленсе, Жапония үшінші орынға тұрақтады.

Сонымен қатар шаңғы жарысынан қоржынымызға қола жүлде түсті.

ІХ қысқы Азия ойындарында шаңғы жарысынан (10 км) еркін стильде сынға түскен Олжас Климин үшінші орынға ие болды.

Айта кетейік, бұған дейін Аяна Жолдас жеке жарыста үшінші орын алған болатын.