Қазақстандықтар аватарын Наурыз мерекесі құрметіне безендіруде

Бүгіннен бастап «25 жыл: Бір Ел. Бір Тағдыр» патриоттық интернет-акциясы аясында барлық әлеуметтік желінің пайдаланушылары аватар суреттерін Наурыз мерекесіне орай ұлттық нақыштағы логотиппен безендіре алады. 

Әлеуметтік желіні пайдаланушылар  25.el.kz. сервисі арқылы аватарларын Наурыз мейрамына орай жасалған мерекелік логотиптермен көркемдеуіне болады. Ол үшін сервисімізге қосымша тақырыптық логотиптер жинақталған батырма қосылды. Әрбір пайдаланушы аватарын қалауына қарай ұлыстың ұлы күні құрметіне сәндей алады.  

Сонымен қатар көптеген қолданушылар өз қиялынан туған мерекелік символдарды ойлап тауып, редакцияға жіберуде. Осыған орай сервисімізге «Өз нақышыңды ұсын» атты жаңа функция қосылды. 

Бүгінгі таңда 25.el.kz сервисi арқылы 106 мыңнан астам ғаламтор пайдаланушылары өз аватарларын патриоттық нақышта безендірді. 

«25 жыл: Бір Ел. Бір Тағдыр.» патриоттық интернет-акциясының  географиялық ауқымы күн өткен сайын кеңеюде. Қатарымызға АҚШ, Қытай, Ұлыбритания, Нидерланды, Ресей, Қырғызстан елдеріндегі қандастарымыз да қосылды.

Қазақстан бойынша Астана және Алматы қалалары көш бастап келеді. Оларға безендірілген аватарлардың 38 пайызы тиесілі. Белсенділік бойынша келесі кезекте Оңтүстік Қазақстан, Қарағанды және Алматы облыстары тұр. Үздік ондықтың қатарына Атырау, Ақтөбе, Шығыс Қазақстан, Ақмола және Маңғыстау облыстары кірді.

25.el.kz. сайтында 16 түрлі негізгі патриоттық нақыштағы логотип ұсынылған. Ал, Наурыз мерекесі қарсаңында сервисімізге ұлыс күніне орайластырылған тағы 16 жаңа логотип қосылып отыр. Кез келген адам солардың арасынан өзіне ұнағанын таңдап, суретін көркемдей алады.

Акция 2016 жылдың 16 желтоқсанына дейін жалғасатынын еске сала кетейік. Әлеуметтік желілердегі суретіңізді Қазақстанда тұңғыш рет жасалған бірегей жоба 25.el.kz. әлеуметтік сервисі арқылы безендіре аласыз.

Айша КЕРЕЙ