Айыппұлдың негізгі мақсаты – заңсыз әрекеттердің жолын кесу - сарапшы

ҚР Президенті жанындағы ҚСЗИ Стратегиялық талдау бөлімінің басшысы Елнар Берікбаев бүгін өткен Үкіметтің кеңейтілген отырысында мемлекет басшысы Қасым-Жомарт Тоқаевтың көтерген мәселелеріне қатысты өз пікірін білдірді, деп хабарлайды El.kz ақпарат агенттігі.

Үкіметтің кеңейтілген отырысында президент Қасым-Жомарт Тоқаев қоғамдық санада құқық тәртібін сақтау және құқық бұзушылықтарға «мүлдем төзбеушілік» қағидатын қалыптастыру маңыздылығын атап өтті.

Мемлекет басшысының айтуынша, шектеулер немесе айыппұлдар енгізу кезінде парасаттылықты басшылыққа алу керек. Айыппұл – әкімшілік құқықта ең көп қолданылатын мәжбүрлеу ықпал ету шарасы. Айыппұлдың негізгі мақсаты – заңсыз әрекеттердің жолын кесу және алдын алу. Сонымен қатар, айыппұлдар да шамадан тыс болмауы керек, – деді сарапшы.

Осы орайда Елнар Берікбаев 2025 жылғы 10 қаңтарда мемлекет басшысы Қасым-Жомарт Тоқаев «Қазақстан Республикасының Әкімшілік құқық бұзушылық туралы кодексіне өзгерістер мен толықтырулар енгізу туралы» заңға қол қойғанын да айтты.

Заңның аясында, мысалы, Қазақстан Республикасы ӘҚБтК-нің 490-бабының талаптарын бұзғаны үшін айыппұл мөлшері 50%-ға төмендетілді:

1) діни жоралғыларды, рәсімдерді және (немесе) жиналыстарды өткізу;

2) қайырымдылық қызметті жүзеге асыру;

3) діни әдебиетті және діни мазмұндағы өзге де материалдарды, діни мақсаттағы объектілерді әкелу, өндіру, шығару, басып шығару және (немесе) тарату;

Бар әлемдік тәжірибе мәжбүрлеу шараларынсыз тәртіпке қол жеткізу мүмкін еместігін көрсетіп отыр, сондықтан біз мемлекеттің іс-әрекетіне түсіністікпен қарауымыз керек, – деді президент.