Ауыл шаруашылығы саласында 4 мыңға жуық кәсіпкерге қаржылай көмек көрсетілді - вице-министр

Бұл туралы ауыл шаруашылығы вице-министрі Әбілқайыр Тамабек айтты, деп хабарлайды El.kz ақпарат агенттігі.

«Аграрлық несие корпорациясы» АҚ желісі бойынша көктемгі егіс және егін жинау жұмыстарын қаржыландырудың жалпы сомасы 140 млрд теңгені құрады және 3,8 мың ауыл шаруашылығы тауарын өндіруші қаржыландырылды.  

Азық-түлік корпорациясының желісі бойынша Азық-түлік корпорациясының ресурстарына жеткізілетін қажетті астық көлеміне келісімшарттар жасалды, оған 81,2 млрд теңге бөлінді, оның ішінде форвардтық сатып алу шеңберінде 21,2 млрд теңге және тауарлық кредит арқылы 60 млрд теңге бөлінді, - деді ол.

Сондай-ақ өсімдік шаруашылығын субсидиялауға өңірлердің бюджеттерінде 87,1 млрд теңге көзделді, оның ішінде тұқымдарды субсидиялауға – 11,4 млрд теңге, тыңайтқыштар сатып алуға – 31,3 млрд теңге, пестицидтерге – 32,5 млрд теңге және су жеткізу бойынша басым дақылдар мен қызметтерді субсидиялауға 11,9 млрд теңге бағытталды.

Биыл вегетациялық кезеңде ауыл шаруашылығы тауарын өндірушілер құрғақшылық пен суармалы судың болмауына байланысты бірқатар проблемаға тап болды, бұл егістіктердің жай-күйіне әсер етті.

Сондай-ақ ол саладағы шешімін таппаған түйткілдерді атап өтті.

Облыс әкімдіктерінің жедел деректері бойынша дәнді дақылдар егістерінің 45,1% (7,8 млн гектар) – жақсы жағдайда, 46% – қанағаттанарлық (8 млн гектар) және 7,5% нашар жағдайда (1,3 млн гектар) болды. Бұл ретте 181 мың гектар немесе астық егістерінің 1%-дан кемі жойылды, бұл негізінен Павлодар облысында болды, бұл көрсеткіш орташа көпжылдық көрсеткіштерден (2,4%) төмен екенін атап өтеміз.

Салыстыру үшін айта кетсем, құрғақ деп саналған 2021 жылы дақылдардың 3,8%-ы жойылған болатын, - деді ол.