Атырауда жас мамандарға арналған “Бос жұмыс орындары” жәрмеңкесі өтті

Атырауда биыл оқу жылын аяқтағалы отырған түлектерге арналған дәстүрлі “Бос жұмыс орындары” жәрмеңкесі өтті. Мақсат – жас мамандарды жұмысқа орналастыруға қолдау көрсету, жұмыс берушілер мен түлектер арасында тікелей байланыс орнату, деп хабарлайды El.kz ақпарат агенттігі.

Өңірлік коммуникация қызметінің ақпаратына сүйенсек, жәрмеңкеге 120-дан астам мекеме мен ұйым өкілдері қатысып, жоғары оқу орындарының түлектерімен танысты. Олар университеттің 2000-нан астам студенті ұсынған түйіндемелерді қарап, әлеуетті мамандармен әңгімелесу жүргізді.

Жәрмеңкеде жұмыс берушілермен тікелей сұхбаттасқан жастар жұмысқа орналасатын мүмкіндікке ие болды. Әсіресе, жас педагогтер ерекше белсенділік танытты.

Биылғы жәрмеңкенің өзгешелігі – білім беру ұйымдарының белсенді түрде қатысуы. Университеттің педагогика бағытында оқып жатқан түлектерінің 90 пайызы “Педагогтердің білімін бағалау” тестілеуінен алдын ала өтіп, сертификатқа қол жеткізді. Бүгін олар қалалық және аудандық білім бөлімдерінің өкілдерімен, сондай-ақ мектеп директорларымен сұхбаттасу мүмкіндігіне ие болып отыр, – деді Халел Досмұхамедов атындағы Атырау университетінің проректоры Асхат Шүкіров.

Жәрмеңкеде барлық факультет түлектеріне арналған түрлі сала бойынша бос жұмыс орындары ұсынылды. Олардың қатарында білім беру, құқықтану, ауыл шаруашылығы, ақпараттық технологиялар, қаржы және шығармашылық бағыттағы ұйымдар бар.