Атырау облысында қайтарылған қаражатқа жаңа мектеп салынып жатыр

Атырау облысы Қызылқоға ауданы Жамансор ауылында 110 орны бар жаңа мектеп-интернат құрылысының іргетасына «уақыт капсуласын» салу салтанаты өтті, деп хабарлайды El.kz интернет порталы.

Жаңа мектеп-интернат мемлекетке заңсыз жолмен иемделіп, кейін қайтарылған активтер есебінен салынып жатыр.

Ауылда осы күнге дейін 60 орындық бастауыш мектеп қана жұмыс істеп келген, онда акт және спорт залдары болмаған. Жоғары сынып оқушылары күн сайын ондаған шақырым қашықтыққа қатынап оқуға мәжбүр болды. Жаңа интернат Жамансор мен оған жақын елді мекендердің балаларын сапалы біліммен қамтамасыз ететін болады.

Жоба мемлекет басшысының тапсырмасы бойынша Арнаулы мемлекеттік қордан ел бойынша қаржыландырылып жатқан 333 әлеуметтік нысанның біріне жатады.