Астаналық оқушылар Бауыржан Момышұлының ескерткішіне тағзым етті

Елордада Жеңістің 80 жылдығына орай астаналық оқушылар Бауыржан Момышұлының ескерткішіне гүл шоқтарын қойды, деп хабарлайды El.kz ақпарат агенттігі.

Іс-шара аясында мектептің 80 оқушысы Ұлы Жеңістің 80 жылдығына орай Бауыржан Момышұлы атындағы саябаққа барып, батыр рухына тағзым етіп, 80 тал гүл шоғын қойды.  

Астана қаласы «Патриот» айлығының жұмыс жоспарына сәйкес, №80 мектеп-гимназиясының ұйымдастыруымен «Тұлғасы тұнған тәлім, ерлігі елге мәлім Бауыржан атаға тағзым» атты патриоттық бағыттағы іс-шара өтті. Оған 5-7-сынып оқушылары арасынан 80 оқушы 80 гүл шоғын ескерткішке қойды. Аталған іс-шара өскелең ұрпаққа отансүйгіштік, тарихи тұлғаларды құрметтеу, Жеңіс жолындағы ерлікті бағалауға баулу мақсатында ұйымдастырылып отыр, - деді Астана қаласы Сәкен Сейфуллин атындағы №80 мектеп-гимназиясының директоры Гүлдерай Майқанова.

Мұндағы мақсат – Бауыржан Момышұлының әскери мұрасын зерделеу, ата-бабаларымыздың ерлігін ұлықтау, насихаттау арқылы өскелең ұрпақтың бойында патриотизм мен ұлттық сана-сезімді қалыптастыру.

Бұл іс-шара өскелең ұрпақты, яғни бізді, батырларымызды құрметтеуге үйретеді әрі тарихымызды ұмытпауға ықпал етеді деп ойлаймын. Батыр бабамыздың өмірі, ерлігі оқушылардың ұлттық рухын көтереді, ұлттық сезімін нығайтады, - деді 7-сынып оқушысы Аяулым Мамытбай.