Астаналық баскетболшылар жастар спорттық ойындарында топ жарды

Шучинскіде баскетболдан Қазақстан Республикасының VI Жастар спорттық ойындары аяқталды, деп хабарлайды El.kz ақпарат агенттігі.

Төрт жылда бір өтетін бұл жарысқа Астана, Алматы, Шымкент қалалары мен Алматы, Қостанай, Қызылорда, Атырау, Түркістан, Павлодар, Жетісу, Ақтөбе және Маңғыстау облыстарынан 140-қа жуық спортшы қатысты. Бұл сында елорда атынан 2007 жылы туған және одан кіші жасөспірімдерден құралған 12 спортшы бақ сынаған. 

Астана командасы жарыс барысында жоғары деңгейде өнер көрсетіп, бірде-бір ойында жеңілмей, абсолютті чемпион атанды.
Айта кетейік, VI Жастар спорттық ойындары – жас спортшылардың шеберлігін шыңдап, болашақ чемпиондардың қалыптасуына жол ашатын маңызды бәсеке. Сондай-ақ, дәл осы жарыста алдағы республикалық және халықаралық турнирлерге қатысатын үздік спортшылар анықталады.

Енді жарыс эстафетасын қыздар құрамасы қабылдайды. Олар 5 сәуірде Түркістан қаласында өтетін VI Жастар спорттық ойындарының ашылуында елордамыздың намысын қорғайды.