Астанада жатақханадан өрт шықты

Астанада полицейлер жатақхана тұрғындарын тілсіз жаудан құтқарды, деп хабарлайды El.kz ақпарат агенттігі.

ІІМ мәліметінше, кезекшілік барысында тәртіп сақшылары жатақханадан түтін шығып жатқанын байқаған.

Полиция қызметкерлері Қуандық Зарапов, Хафиз Мукушев және Дәурен Асқаров шұғыл түрде оқиға орнына жетіп, эвакуация жұмыстарын ұйымдастырды. Сақшылар жоғарғы қабаттарды тексеру барысында алты адамнан тұратын отбасыны көрген. Олар өрт шыққанын білмей, ұйықтап жатқан. Полицейлер тұрғындарға, оның ішінде балалар мен мүмкіндігі шектеулі әйелге қауіпсіз жерге шығуға көмектесті. Өрт сөндірушілер келгенге дейін полиция қызметкерлері өрт шыққан бөлмеден газ баллондарын сыртқа алып шығып, болуы мүмкін жарылыстың алдын алды, - делінген мәліметте.

Зардап шеккендер жоқ. Қазіргі уақытта өрттің шығу себебі анықталып жатыр.