Астанада сұранысқа ие мамандықтарды меңгеруге арналған қандай бағдарламалар бар

Астана қаласы тұрғындарының біліктілігін растауға және сұранысқа ие салаларда қажетті дағдыларды алуға көмектесетін бірнеше бағдарламаны іске қосылды. Бұл туралы елорданың Коммуникациялар қызметінде өткен брифингте Астана қаласы әкімдігінің «Еңбек мобильділігі орталығы» директоры Омар Олжас айтты, деп хабарлайды El.kz ақпарат агенттігі.

Спикердің айтуынша, Career Enbek платформасында тіркелген жұмыссыздарға арналған жаңа функция іске қосылды, ол арқылы IT саласындағы кәсіби біліктілікті тегін растауға арналған ваучерлер алуға болады. Бұл – желілік әкімші, жүйелік талдаушы, ақпаратты қорғау инженері және басқа да мамандықтарда жұмыс істеп жүрген немесе дамуды жоспарлап отырған мамандар үшін үлкен мүмкіндік.

Процедура өте қарапайым. Біздің Еңбек мобильділігі орталығымыз мамандық таңдаудан бастап, Career Enbek платформасында өтініш беруге дейінгі барлық кезеңде көмектеседі. Біз өтініш беруден бастап, кәсіби біліктілікті растау орталығында емтихан тапсыруға дейінгі бүкіл процесті қадағалаймыз. Емтихан теориялық және практикалық тапсырмалардан тұрады, оны сәтті аяқтағаннан кейін біліктілікті растау туралы құжат беріледі, - дейді Омар Олжас.

Оған қатысу үшін келесі қадамдарды орындау қажет:

1. Еңбек мобильділігі орталығы тіркелген жұмыссыздардың арасынан үміткерлер санын анықтап, мамандық пен аккредиттелген біліктілікті растау орталығын таңдауға кеңес беріледі.
2. Содан кейін Career Enbek платформасында тіркелуге және ЭЦҚ арқылы ваучер алу үшін өтініш беруге көмек көрсетіледі.
3. Өтініш мақұлданғаннан кейін ваучер жеке кабинетіңізде пайда болады, содан кейін біліктілікті растау процедурасынан өте аласыз.

Орталық басшысы өз сөзінде Enbek.kz порталында 2025 жылға арналған екі негізгі бағдарламаға қатысу үшін 31 қазанға дейін өтінімдер қабылданатынын айтты.

Олар:
1. Жастар практикасы – бұл бағдарлама түлектерге алғашқы кәсіби тәжірибе жинақтауға, ал жұмыс берушілерге – білім алуға дайын, жігерлі қызметкерлер табуға мүмкіндік береді. Сонымен қатар, Астана қаласының Еңбек мобильділігі орталығы өткен жылдары жұмысқа орналасу тәжірибесінің қорытындылары бойынша қатысушылардың тұрақты жұмыс орындарына орналасуын ескереді.

2. Қоғамдық жұмыстарды ұйымдастыру – бұл жоба жұмыссыздарды уақытша жұмыспен қамтуға бағытталған. Қоғамдық жұмыстарға қатысу ұзақтығы 12 айдан аспайды. Қоғамдық жұмыстарға қатысу құқығына жұмыссыздар, жазғы демалыс кезінде денсаулыққа зиян келтірмейтін және оқу процесіне кедергі келтірмейтін жағдайда жалпы білім беретін мектептердің жоғары сынып оқушылары, сондай-ақ бос тұрып қалу салдарынан жұмыспен қамтылмаған тұлғалар ие.