Астанада қазақ-швейцар саяси консультациялары өтті

Қазақстан Сыртқы істер министрлігінің ғимаратында Қазақстан Республикасы мен Швейцария Конфедерациясы сыртқы саяси ведомстволары арасындағы саяси консультациялардың 6-раунды өтті, деп хабарлайды El.kz ақпарат агенттігі.

СІМ мәліметінше, кездесу барысында екі елдің дипломаттары Қазақстан-Швейцария ынтымақтастығының жай-күйі мен даму перспективаларын жан-жақты талқылады. Атап айтқанда, халықаралық және өңірлік күн тәртібіндегі өзекті мәселелер бойынша пікір алмасылды, сондай-ақ 2025 жылға жоспарланған екіжақты іс-шаралар мен сапарлар кестесі қаралды.

БҰҰ Бас Ассамблеясының 79-сессиясы аясында өткен екі елдің сыртқы саяси ведомстволары басшыларының кездесуінің маңыздылығын атап өтіп, тараптар сауда-экономикалық және инвестициялық байланыстарды жандандыру бойынша бірлескен жұмысты жалғастыруға, сондай-ақ екіжақты құқықтық базаны, оның ішінде Қазақстан мен Швейцарияның салалық ведомстволары арасында ынтымақтастықты нығайтуға келісті.