Астанада қар тазалауға 2 600-ден астам жол жұмысшы жұмылдырылды

Елорданың коммуналдық қызметі тәулік бойы жұмысын күшейтілген үздіксіз режимде жалғастыруда. Күн сайын олардың күшімен қаладан ондаған мың текше метр қар шығарылады, деп хабарлайды El.kz ақпарат агенттігі Астана әкімдігінің ресми сайтына сілтеме жасап.

9 қаңтарда күндізгі ауысымға қар тазалау жұмысына 2600-ден астам жол жұмысшы мен 1700-ден астам арнайы техника жұмылдырылғаны мәлім болды. Елордадан қар полигондарына 55 мың текше метрден астам қар 4 068 рейспен шығарылды. Қыс мезгілінің басынан бастап қаладан 2 638 609 текше метр қар 205 297 ауыр жүк рейсімен шығарылды.

Ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады. Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.

Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.