Астанада қар күреу жұмыстары тәулік бойы тоқтаусыз жалғасуда

Астанада коммуналдық қызметкерлер қар күреу бойынша тәулік бойы тоқтаусыз жұмыс істеп жатыр. Жол жұмысшылары бір күнде қаладан 50 мың текше метрге жуық қар шығарды, деп хабарлайды El.kz ақпарат агенттігі.

Әкімдіктің мәліметіне сүйенсек, қыс мезгілінің басынан бері қаладан 198 506 рейспен 2 583 547 текше метр қар шығарылды.

Ережеге сәйкес, ең алдымен жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және тағы да басқалары тазартылады. Мұнан соң орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.

Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.