Астанада коммуналдық қызметкерлерді қолдау үшін "Кел, шәй ішейік" акциясы өтті

Астана қаласы «Нұра» ауданы әкімдігі мен «AMANAT» партиясы жанындағы «Жастар Рухы» жастар қанатының еріктілерінің ұйымдастыруымен «Кел, шәй ішейік» акциясы өтті. Мақсат - коммуналдық қызметкерлерді қолдау, деп хабарлайды El.kz ақпарат агенттігі.

Әкімдіктің мәліметінше, еріктілер коммуналдық қызметкерлерге «Бухарест» саябағының аумағын қардан тазартуға көмектесіп, оларға ыстық шай мен дәмді тағам ұсынды. Өз кезегінде коммуналдық қызметкерлер жылы лебіздерін танытып, өзара қолдау атмосферасын қалыптастырды.

Жақсы дәстүрге айналған іс-шара «Таза Қазақстан» акциясы аясында өтті. Мұндай бастамалар коммуналдық қызметкерлер еңбегінің маңыздылығын айқындап, әлеуметтік бірлікті нығайтуға ықпал етеді, — деді ішкі саясат және әлеуметтік сала бөлімінің бас маманы Руслан Сәбитов.