Астанада әуе рейстері кешіктіріліп жатыр

Бүгін елордада ауа райының қолайсыздығына байланысты рейстер бірнеше сағатқа кешігіп жатыр, деп хабарлайды El.kz ақпараттық агенттігі.

Дегенмен әуежай штаттық режимде жұмыс істеп жатыр. Ұшақтар 1 сағаттан 6 сағатқа дейін кешіктіріледі.

Бүгін Алматыға ұшатын 17 рейстің үшеуі кешіктіріледі. 07:15-тегі «FlyArystan» ұшағы 12:40-қа, 11:55-дегі «Qazaq Air» рейсі 13:00-ге және 11:30-да Алматыға ұшуы керек «Аir Astana» әуе рейсі 11:50-ге ауыстырылды, - деп мәлімдеді Nursultan Nazarbaev әуежайының ақпарат бөлімі.

Сондай-ақ халықаралық рейстер де бірнеше сағатқа кешігіп ұшады. Ыстамбұлға 06:10-да аттануы тиіс «Pegasus» рейсі 13:35-ке ауыстырылды. Шарм-эль-Шейхке 11:05-де ұшуы тиіс рейс 13:30-ға ауыстырылды. Ереван мен Омбыға ұшатын рейстер де бір сағатқа кешігеді.

Бүгін түнде 00:20-да Астанадан Бейжіңге ұшатын рейс тоқтатылған. 

Бейжіңге ұшатын рейстің қай уақытқа ауыстырылғаны әлі белгісіз. Рейстердің кешігетіні және ұшпайтындығы туралы ақпарат жолаушыларға смс хабарлама арқылы жіберілді, - деді әуежайдың ақпарат бөлімінің қызметкері Индира Уәлиева.