Астанада 2 600-ден астам жол жұмысшы қар күреуге жұмылдырылды

Елорданың коммуналдық қызметтері қар күреу жұмысын тәулік бойы тоқтаусыз жүргізіп жатыр, деп хабарлайды El.kz ақпарат агенттігі.

4 ақпанда күндізгі ауысымда елордада қар күреуге 2 630 жол жұмысшысы мен 1 783 арнайы техника шықты. 4 ақпанға қараған түні коммуналдық қызметтер 3 681 рейспен қаладан 47 мың текше метрден астам қарды шығарды. Қыс мезгілінің басынан бастап қаладан полигондарға 383 545 ауыр жүк рейсімен 4 млн 897 мың текше метрден астам қар шығарылды. Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.

Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие. Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған. Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.