Астана үйлеріне мерзімінен бұрын жылу беріле бастады

Елордада күн райының суытуына байланысты жылыту маусымы мерзімінен бұрын басталды, деп хабарлайды El.kz.

Қаладағы әлеуметтік нысандарға (медицина мекемелері, мектептер, балабақшалар, спорт нысандары және тағы басқасы) жылу 27 қыркүйекте берілген болатын.

Айта кетейік, тұрғын үй алаптарын газдандыру жұмыстары жалғасып жатыр. Алматы және Сарыарқа аудандары үйлерді газға қосу мүмкіндігімен толық қамтамасыз етілген.

Жеке сектор тұрғындары үшін көмір сататын компаниялар анықталды. Бағаның өсуіне жол бермеу мақсатында компаниялармен көмір құнын бекіту туралы тиісті меморандумдар жасалды. 109 нөмірі бойынша «шұғыл желі» жұмыс істейді, онда тұйықтықтағы (тупик) көмірдің қоры және бағасы туралы білуге болады.