«Астана» БК Қазақстан U-16 құрамасының базалық клубы атанды

«Астана» БК бас директоры Самсон Аракелян мен ҚР Ұлттық баскетбол федерациясының президенті Абай Алпамысов «Астанаға» Қазақстан U-16 құрамасының базалық клубы мәртебесін беру туралы меморандумға қол қойды, деп хабарлайды El.kz ақпарат агенттігі Спортты дамыту дирекциясына сілтеме жасап. 

Меморандум 2023 жылдың 17-24 қыркүйегі аралығында Катарда өтетін Азия Кубогына қатысатын Қазақстан U-16 құрамасы «Астана» инфрақұрылымының базасында құрылатыны туралы келісімді бекітеді.

Құраманы осы маусымда «Астана» Академиясына қосылған жаттықтырушы Никита Ғалиахметов басқарады. Оның басшылығымен 12-16 сәуір аралығында еліміздің әр өңірінен келген жас баскетболшылар қатысатын іріктеу жиыны өтеді.

Жиын қорытындысы бойынша жиналған құрам осы уақытта Қазақстан астанасында өтетін U-21 санатындағы ҚР жастар чемпионатына есептен тыс қатысады.