«АрселорМиттал Теміртау» ресейлік компанияға беріле ме? Роман Скляр жауап берді

«АрселорМиттал Теміртауды» ресейлік «Северсталь» компаниясына беру туралы келіссөздер жүргізіліп жатқан жоқ. Бұл туралы премьер-министрдің бірінші орынбасары Роман Скляр айтты, деп хабарлайды El.kz ақпарат агенттігі.

Олай емес. Келіссөздер жүргізілмейді. Иә, компанияның жабдықты жөндеу, инвестициялар бойынша міндеттемелерін орындамай отыр. Кәсіпорында адам өлімімен аяқталған қайғылы оқиғаларды жоққа шығармаймыз. Әрине, адам өлімі бізді алаңдатпай қоймайды. Сондықтан тиімді жұмыс істей алатын және осы өндірісті дамыту үшін қаражат сала алатын басқа инвесторларды тарту бойынша жұмыс жүргізілуде. Ал сіздер атаған компаниямен келіссөздер жүргізілмейді. Қандай компаниялар екенін айта алмаймын, - деді Роман Скляр.

Алайда ол қандай инвесторлармен келіссөз басталғанын айтудан бас тартты.

Бұған дейін БАҚ пен әлеуметтік желіде "АрселорМиттал Теміртау" АҚ нысандары ресейлік "Северсталь" компаниясына сатылуы мүмкін екені туралы ақпарат тараған болатын.