Ақтөбеде қыс айларына арналған арнайы техникалар паркі жаңартылуда

Ақтөбе қаласының әкімдігі жолдарды қыс айларында күтіп ұстауға арналған арнайы техникалар паркін толықтыру бағытындағы жұмыстарды күшейтуде, деп хабарлайды El.kz ақпарат агенттігі.

Мәселен, өткен аптада қалаға жолдарды қардан тазалайтын канадалық техниканың - тиегішке арналған аспалы жабдықтың (шнекоротор) үшеуі әкелінді. Жаңа техника “АТК қызмет” ЖШС балансына берілді. 

Тиегіш техниканың алдына салып қолданатын үш арнайы техника әкелінді. Мұның бірден-бір пайдасы жұмыс күшін оңтайландырып, уақытты үнемдейді. Бұрын "погрузчикпен" қар тиеп жүргенде 25 тонналық “Шахман” жүк көліктерін 30-40 минутта толтыратын болса, енді мына жаңа канадалық техниканың көмегімен 3-4 минутта “шахманға” қар тиеп толтырып болады,-деп атап өтті әкімдіктен.

Бұл техниканың тағы бір ерекшелігі қарды кесек-кесек етіп емес, ұнтақтап барып тиейді. Онысы қар қалың түскен кезде қала ішінен тез шығаруға көмегін тигізеді екен.