Ақтөбеде қаптама шығаратын ірі зауыт ашылады

Ақтөбеде гофроқаптама мен стрейч-пленка шығаратын зауыттың құрылысы аяқталуға жақын, деп хабарлайды El.kz интернет порталы.

2023 жылы басталған жобаны биыл іске қосу жоспарланып отыр. Құрылыс кезінде нысанда 30-дан 50-ге дейін адам жұмыс істеді, ал толық қуатында іске қосылғаннан кейін тұрақты жұмыс орындарымен 200-250 қызметкер қамтылады.

Жобаның жалпы инвестиция көлемі — 1,8 млрд теңге. Кәсіпорын жылына 21 млн м² қағаз өнімдері мен 1,8 мың тонна стрейч-пленка өндіруді жоспарлап отыр. Қазіргі уақытта құрылыс-монтаж жұмыстары аяқталып, технологиялық жабдық орнатылып жатыр. Өндірістік ғимараттың ауданы — 5 400 м².

Өндіріс заманауи, экологиялық және өнеркәсіптік стандарттарға сай жабдықтарды пайдалану арқылы өнімнің жоғары сапасын қамтамасыз етеді. Болашақта кәсіпорын ішкі нарықтың қажеттілігін толық өтеуді көздеп отыр.

Жаңа зауыттың іске қосылуы өңірдегі өңдеуші өнеркәсіптің дамуына және жаңа жұмыс орындарының ашылуына маңызды қадам болады. Жоба сондай-ақ экономиканы әртараптандыруға және импорттық қаптамаға тәуелділікті азайтуға үлес қосады.

Кәсіпорын өңдеу тізбектерін қалыптастыруға ықпал етеді деп күтілуде, ал қаптамада тұтынушыларға сұрыптау мен қайта өңдеу мүмкіндігі туралы ақпарат орналастыру жоспарланып отыр. Бұл халық арасында экологиялық мәдениетті қосымша дамытуға мүмкіндік береді.