Ақтөбе облысында су басқан автожолдардың жайы белгілі болды

Ақтөбе облысында республикалық маңызы бар автомобиль жолдарындағы су тасқынының жағдайы белгілі болды, деп хабарлайды El.kz ақпарат агенттігі. 

20 наурызда таңғы уақытта «Қандыағаш-Ембі-Шалқар-Ырғыз» республикалық маңызы бар А-26 автожолының 288-ші шақырымында еріген қар суы жол учаскесін су басып, оның салдарынан су тасқыны орын алған еді.

Жол бетіндегі еріген судың ені 300 метр, биіктігі шамамен 20-30 сантиметрге жетті. Бұл аумақта бір су өткізгіш құбыры бар, ол тұрақты жұмыс істеп тұр.

Сондай-ақ, су ағынын бөгеу және оны болдырмау мақсатында 650 қап құм және қосымша 480 тонна құм төселді.

Су тасқынын жою үшін «КАЖсервис» ЖШС (ДЭУ-13, Шалқар) филиалынан 5 жұмысшысы және 3 бірлік мамандандырылған техника жұмылдырылды. Жолдың бұл бөлігінде көлік қозғалысы шектелмеген, көліктер кедергісіз қозғалуда. Жол жағдайы тәулік бойы бақылауға алынғаны белгілі болды.